2024-2025 оқу жылының аяқталуы бойынша бұйрық
Облыстардың, Астана, Алматы, Шымкент қалаларының білім басқармалары
Қазақстан Республикасы Оқу-ағарту министрлігі (бұдан әрі – Министрлік) республика мектептерінде оқу жылы 2025 жылғы 23 мамырда аяқталатынын назарларыңызға жеткізеді.
Оқу жылын жалпы білім беретін мектептер «Білімім – Отаныма!» атты республикалық сынып сағатымен аяқтайды.
Сынып сағатында «Адал азамат» біртұтас тәрбие бағдарламасының құндылықтарына басымдық берілуі керек. Осы ретте, Министрлік барлық білім алушылар арасында эссе байқауын өткізу туралы ұсынымдар әзірледі (қоса беріледі). Білім алушыларға «Таза Қазақстан», «Заң және тәртіп», «Адал азамат» тақырыптық бағыттары бойынша эссе жазу ұсынылады. Үздік жұмыстар сынып сағатында оқылып, авторлары марапатталады. Ұсынымдарды білім беру ұйымдарының назарына жеткізіп, орындалуын ұйымдастыруды сұраймыз.
Сынып сағаттарының сценарийлерін педагогтер әр сыныптың жас ерекшеліктерін ескере отырып, өз бетінше әзірлейді. Сынып сағатында демалыста оқуға ұсынылатын кітаптар тізімін, сондай-ақ қарауға болатын фильмдер тізімін ұсынып, қауіпсіздік шаралары, алдын ала жоспарланып ұйымдастырылған демалыстың артықшылықтары, қосымша білім беру ұйымдарына қатысудың тиімділігі, еңбек етудің пайдасы, ата-анаға, ата- әжелеріне көмектесудің қажеттілігі айтылады.
Министрлік Оқу жылының аяқталуы бойынша салтанатты іс-шараны өткізуге қатысты барлық мектеп дәстүрлерін (мектепке, ұстаздарға алғыс білдіріп, өлең оқу, ән айту, түлектер вальсін билеу) қолдай отырып, мектептердің салтанатты жиын өткізу туралы шешімді дербес қабылдайтынын хабарлайды.
Жоғарыдағыны ескере отырып, оқу жылының аяқталуы бойынша 11 сынып түлектері үшін салтанатты іс-шараны педагогикалық кеңестің ұсынысы негізінде 23 немесе 24 мамырда өткізуді ұсынады (23-інен ерте емес).
2
2024-2025 оқу жылы 364 мыңнан астам түлек 9-сыныпты және 217 мыңнан астам түлек 11-сыныпты бітіруде. Бұл түлектердің алдында болашақ мамандығын таңдау және одан әрі білім алу жолын анықтау тұр.
9-сынып бітірушілер үшін қорытынды мектеп бітіру емтихандары 29 мамыр - 10 маусым аралығында өтеді, ал 11-сынып бітірушілер үшін мемлекеттік емтихандар 30 мамыр – 16 маусым аралығында болады.
Негізгі және жалпы орта білім беру туралы аттестатты тапсыру салтанатын мектеп қабырғасында 18-20 маусым аралығында өткізу ұсынылады.
Министрлік сынып сағаттары мен салтанатты іс-шараларды өткізу барысында дипломдар мен сертификаттарды ресми түрде табыстауға болатындығын еске салады.
Педагогикалық этиканы сақтау және сыбайлас жемқорлық құқық бұзушылықтардың алдын алу мақсатында:
- ата-аналардан қаражат жинауға,
- аниматорлар, агенттіктер мен жеке студияларды тартуға,
- көлік жалдап, шерулер ұйымдастыруға,
- мектепке дейін білім беру ұйымдарының түлектері мен 4-сынып оқушылары үшін салтанатты шаралар өткізуге жол берілмейді.
Сонымен қатар, мектеп әкімшілігі мен мұғалімдерге сыйлықтар алу үшін қаражат жинауға қатаң тыйым салынады.
Білім беру ұйымдарында аталған өрескелдіктер орын алған жағдайда заңнамаға сәйкес қатаң шаралар қолданылатынын қаперлеріңізге саламыз.
Оқу жылының аяқталуы туралы ақпаратты Министрлікке ағымдағы жылғы 1 маусымға дейін жолдау қажет.
Қосымша: 2 парақта.
Қазақстан Республикасы
Оқу-ағарту вице-министрі Е. Оспан
Орын. С. Шонова Тел.74-27-14
